1Cor 1 | APZ | STEP | Anɨtu kako ngko Poulɨ'nɨmo nɨhwosopo'mentisoso Jisas Kɨlaisɨye hungkuno a'amu somo lɨku'mofo ( apousel ) syoho ntapmmentiso sohwo'nnonji nenɨngkwa'wehwo Sousɨtenisɨ'nji

1 Corinthians 1

1 Anɨtu kako ngko Poulɨ'nɨmo nɨhwosopo'mentisoso Jisas Kɨlaisɨye hungkuno a'amu somo lɨku'mofo (apousel) syoho ntapmmentiso sohwo'nnonji nenɨngkwa'wehwo Sousɨtenisɨ'nji 2 nekwo nohumentai sekwo a'amu ango Koulinjo sokune'no olo iyoswo loso semtɨ'mokiyalokuhwoyo. Sekwo Kɨlaisɨmo ufohi'nontɨfi kakoe a'amu ne imo'nɨmentohofofoho. Oso hiso'no Anɨtu kakine'no sekumo sehwosopo'mentisofoho. Sekwo'nohinɨ'maho. O'o, hwe moya'mi ango'meemjo nakwoe Hwe Engo Jisas Kɨlaisɨmo jomo ulɨwo'nɨngkuhwone hn'nɨmo nahwosopo'mentisofoho. Jisas huhwo sohwo kako nakwo hwe moya'mi hopi'nonohino hn'nwiye Hwe Engo nɨhu'no anga'nohino hweho. 3 Nanɨngkwohwo Anɨtu sohwo'nji nakwoe Hwe Engo Jisas Kɨlaisɨ'nji siko'monta'i siko sekumo wopɨngo selohofohosɨsi sɨmeho pompenjiyo wosejopanjiyoho.

Poul kako Anɨtumo oso a'amu homo somne'no isamoyoka ulɨmentisofoho.

4 Kɨlais Jisas kako sekumo wopɨngo seloho'mentiso so'no ngko engolopohamo sekune'no huno syasyefɨsyonji Anɨtumne'no isamoyoka ulɨwo'nɨngkohefoho. 5 Nakwo Kɨlaisɨye hungkuno selɨmentɨhwone so'no oso hungkuno hiso sekwo aho yokumpohn'nyo kemokosyohumantɨfi sekwo Kɨlaisɨmo ufohi'nɨngkahonɨngkofi kako sekumo yo'mayo so'no umofonyo miyo'njo iyo'ne semokumentisofoho. U, sekwo kakoe hungkuno wopɨngo so'no huno tɨpemantɨfi sekwo nom'ne a'amu somo lutɨhwayo'neso huno'njo kuyoho. Oso'no ngko Anɨtumo isamoyoka ulalokweno. 7 Nakwoe Hwe Engo Jisas Kɨlais kako utɨhwa'nyopo asomo peso'no sekwo nohontohumentanɨngkofi Anɨtu sohwo kako kakoe yo'mayo wopɨngoso sejopalofoho. Kakoe wopɨngo somne'no sekwo umofonyo mifitnnehofo. 8 O'o, Anɨtu kakoe yokumpohn'nyo so'nji sekumo sesosofitofontanɨngkuhwosi sekwo Anɨtumne'no yokumpohn'nyo lohofontanɨngkuji sekwoe sɨkunoso moi'wo umo'nɨmontonoho. Oseso nakwoe Hwe Engo Jisas Kɨlaisɨye Sɨkuno Engo kako asomo poso sohonta sekwo wonyo ane lohofɨkuji wonɨmango masenonehoho. 9 Anɨtu kako kakoe Hwomu Jisas Kɨlais nakwoe Hwe Engo sohwo'nji nakwo'nji sɨmeho afa inyo'ne nakumo nahwosopo'mentisofoho. Nakwo Kɨlaisɨ'nji majopohi'nyo'ne nahwosopo'mentisofoho. Oso hiso'no ne imokiyo'neso Anɨtu kako hoponoho. Kako kakoe hunoso mɨkwesyafɨsyonehoho. O'o, awonoho.

A'amu Koulin hofɨko Anɨtune'no uhu'mokumotofoso hofɨko husilo husilofo loho'mentohofofoho.

10 U, nje a'amu soku nakwoe Hwe Engo Jisas Kɨlais kako olo hungkuno ntapmmentiso so'no ngko hungkuno yokumpohn'nyo waselɨmonne'no yohono. Sekwo upa'nɨmno. Sekwo yoka hnnontɨfi husilo husilofo loho'malofoso moi'wonoho. Sekwo apa'no oso yahinoso ikutoho. O'o, sekwo apa'no nuhu'mokukuji hungkuno afa'nohino filɨkuno huno anga'no'nohini fɨsyafɨhupmno. 11 U nje a'amu soku oso ape Kɨlouwe siye ango'mta'ango a'amu nopontɨfi ngkimo ole ntɨmalofi, A'amu Koulinɨso hofɨko yoka hnnalokwofo. Ose ntɨmalofofoho. 12 Ngko sekwo a'amu anga'no anga'nohino sokumo selalokweno. Sekwo huno kengo kengo syafɨsyontɨfi a'amu fehohnjo soku ole lalokwofo, Nakwo Poulɨye yahinomo inɨngkowalokuhwono. Nom'ne soku sekwo ole lalokwofo, Nakwo Apoulousɨye a'amu'nwoho. Nom'ne a'amu soku sekwo ole lalokwofo, Nakwo Pitaye hungkunomo inɨngkowalokuhwono. I, a'amu nom'ne soku sekwo ole lalokwofo, Nakwo Kɨlaisɨye a'amu'nwoho. Ose lalokwofo. 13 Pipineto. A'amu pi'nɨngo engo hofɨko sekwoe wonyomne'no pe'nɨmentohofotaho. Ngko Poulɨ'ni iyo hwojiyafɨku'nnyopo sekwoe wonyomne'no lape'nɨmaleno. O'o, sekwo huno seyohoho. Kɨlais kako'nohini sekwoe wonyomne'no poyo pe'nɨmentisofoho. I hofɨko ngkine'no mijo kiyosema'malofotaho. O'o, Kɨlaisɨmne'nohini sekumo mijo kiyosema'malofofoho. 14 Ngko sekwo'njo sopo mijo kiyomayoso a'amu pi'nɨngo'maho. O'o, Kɨlisɨposɨ'nji Ngkaiyasɨ'njimnohini mijo kiyoma'maleno. Oso'no ngko a'amu hufa'u hwa'umnohini mijo kiyoma'mentohe so'no Anɨtumo isamoyoka ulalokweno. 15 Oso'no a'amu pi'nɨngo engoso hofɨko ole malɨfitnnehofo, Poul kako nakumo mijo kiyonema'mentiso so'no nakwo Poulɨye a'amu'nwoho. Ose malɨfitnnehofo. 16 U, ngko nom'ne a'amu sohune'no syafɨsyohono. Sɨtefanosɨye a'amu oso hwanjimo ngko mijo kiyoma'maleno. U, ngko nom'ne a'amu somo mijo kokiyoma'mentohono. Awolɨkeno. Ngko huno maniyohoyohoho. I, ngko mijo kiyomayo hungkuno so'no peho'no selalokweno. 17 Kɨlais kako ngkimo oso mijo kiyomayo syohoso montapmmentisofoho. O'o, ngkimo kako a'amu somo kakoe hungkuno lutɨhwayo'ne syoho ntapmmentisofoho. A'amu huno'njo sohwa hofɨko hungkuno sawemo lutɨhwawo'nɨngkohofo hopaso ngko hungkuno molutɨhwamnehono. O'o, Kɨlais kako iyo hwojiyafɨku'nnyomo nakwoe wonyo'ne poyo pe'nɨmentiso so'no a'amu huno nto'no mosyafɨhupitnnoho lonji ngko a'amufe huno nto'no ehohosasiyo'ne hungkuno tɨfo tɨfo lutɨhwawo'nɨngkohe hwo'nyoho.

Nakwo Kɨlaisɨmo uhwonontani uhwonɨmentɨhwoneso nakwo Anɨtuye yokumpohn'nyo'nji kakoe huno wopɨngo so'nji nto uhwonɨmentɨhwonefoho.

18 A'amu Anɨtumo minɨngkayo'njo iwo'nɨngkohofoso hofɨko Kɨlais nakwoe wonyo'ne iyo hwojiyafɨku'nnyomo poyo pe'nɨmentiso so'no upa'nontɨfi hofɨko huno ole syofɨsyalokwofo, oso hungkuno lɨwo'nɨngkohofoso hwayohosi hungkunofoho. Ose syofɨsyalokwofo. I, oseso nakwo a'amu Anɨtu kako nakumo asomo netɨmayo'ne'no hontohumentani nakwo huno ole nayɨwo'nɨngki, Kɨlais kako nakwoe wonyo'ne iyo hwojiyafɨku'nnyomo poyo imo'nɨmentiso sohune'no Anɨtu kako kakoe yokumpohn'nyo netɨhwamentisofoho. 19 A'amu Anɨtuye hungkuno mtɨ'mokumentohofo sohwa hofɨko a'amu Kɨlaisɨmne'no nakwolaho lɨwo'nɨngkohofo somne'no ole mtɨ'mokumentohofi,

Anɨtu ole lɨmento, A'amu hwahoponjoso hofɨko hofɨkoe yokumpohn'nyo so'nji Anɨtumo u'mayo'ne'entɨfi huno uyalokunjo oso a'amuso hofɨkoe huno somo ngko wonyo umokumonnoho.
Nakwo a'amu hwahoponjo hn'nwi huno'nji lɨwo'nɨngkohofoso hofɨko Anɨtumo u'mane'entɨfi honɨngkano pi'nɨngo pi'nɨngo hofɨkoe huno mta'ni imofɨwo'nɨngkohofo somo ngko wae weeo'monnoho.
Anɨtu ose lɨmentisofoho. 20 A'amu Anɨtumo minɨngkayoso hwahoponjo somne'nohini huno syafɨsyɨwo'nɨngkohofoso hofɨko ole lɨwo'nɨngkohofi, Nakwo huno'njo hn'nwi nakwoe huno nto'nohinoso a'amu nom'ne somo lutɨhwane'entɨfi syafɨsyɨwo'nɨngkohofofoho. Oso a'amumne'no Anɨtu kako kakoe a'amu ne hn'nyumo ole netɨhwamento, Olo hwaho loponjo hunoso wonyo hwayo hohnjofoho. Oso'no a'amu kako olo hwaho loponjo huno somnohini syafɨsyɨwo'nɨngkiso sohwo kakoe huno neso mauyoho.

21 I oso'no Anɨtu kako huno hwapɨngo'njo sohwo kako olo honɨngkanolo imo'mentisofoho. A'amu hofɨko Anɨtumo u'mano lɨkujoso hofɨko hofɨkoe huno mta'ni Anɨtumo mu'mapitnnohofo. O'o, awonoho. I oso'no Kɨlaisɨye hungkuno wopɨngoso a'amu somo lutɨhwawo'nɨngkuhwone somo sɨmeho hi'ntnnono uyɨkuji hofɨko Anɨtumo u'mantɨfeho. Nu'mafɨkuji hofɨko kakoe a'amu ne umo'nantɨfeho. Oso hiso'no Anɨtu kako sɨmeho wopɨngo umo'nɨwo'nɨngkisofoho. I oso hungkuno hiloso nakwo lutɨhwawo'nɨngkuhwone somne'no hofɨko nalɨwo'nɨngkohofi hwayo hohnjo hungkuno lɨwo'nɨngkohofo kuyoho. Ose nalɨwo'nɨngkohofofoho. 22 I a'amu Jutaso ole lɨwo'nɨngkohofi, Anɨtu kako nakumo kakoe yokumpohn'nyo'nji yo'mayo kengo wonyoangkafo a'amu mifijoso netɨhwaso'manji u oso hungkunoso Anɨtu mta'ango'manji uhwonɨngkuhwasi oso hungkuno homo somo nakwo huno naihwoso'no tɨfi unɨngkowano. A'amu Ngkɨlik oso hwa ole lɨwo'nɨngkohofi, u, nakwo yo'mayo hungkuno upo'nasoso huno wopɨngofoho syofɨsyaso'manji oso hungkuno homo somo huno naihwoso'no tɨfi unɨngkowano. 23 I oso'no nakwo hungkuno lutɨhwawo'nɨngkuhwoneso olenoho. Kɨlais kako nakwoe wonyomne'no iyo hwojiyafɨku'nnyomo poyo imo'nɨmentisofoho. I oso'no a'amu Jutaso hofɨko oso hungkuno hiso'no nakwolaho lontɨfi wonɨpaho ikinɨwo'nɨngkohofofoho. A'amu Ngkɨlik sohwa hofɨko oso hungkuno homo somo nupa'nontɨfi ole lɨwo'nɨngkohofi, Olo hungkuno loso kokato'nnyofoho. Ose lɨwo'nɨngkohofo kuyoho. 24 I nakwo a'amu Juta hn'nnonji temtitofo kengo kengo hn'nɨmo Anɨtu nahwosopo'mentiso hn'nwi nakwo Anɨtuye mampahomo upo'nontani nakwo huno ole nayohi, Kɨlais kako nakumo asomo netɨmayo'ne poyo pe'nɨmentiso sohumo nuhwonontani uhwonɨmentɨhwoneso nakwo Anɨtuye yokumpohn'nyo so'nji Anɨtuye huno wopɨngo so'nji uhwonalokuhwono. 25 Oso honɨngkano Anɨtu kakimo u'mayo'ne imo'mentiso so'no a'amu hwahoponjoso hofɨko huno syafɨsyontɨfi hofɨko ole lɨwo'nɨngkohofi, Olo honɨngkano loso ne anefoho. Hwayo hohnjofoho. Ose lontɨfeso hofɨkoe huno so'nji yokumpohn'nyo so'nji Anɨtu kakoe huno hwapɨngo so'nji kakoe yokumpohn'nyo so'nji hofɨkimo yakolo'nnyofoho.

26 Ou, nje a'amu soku, Anɨtu kako sekumo kakoe a'amu ne imo'nyo'ne joho selɨmentiso sohonta sekwo huno ane, yokumpohn'nyo ane, yofe engo ane imo'nɨmentohofo kuyoho. 27 A'amu hwahoponjo yahino somne'no huno'njoso Anɨtu kako oso a'amu homo somo wonɨmango ufisyɨmo'mo lonto a'amu huno'masoso hofɨko nje honɨngkanomo tɨfi nnɨngkapɨkuji nje a'amu ne imo'nɨfitnne'ento uhwosopo'mentisofoho. A'amu hwahoponjo yokumpohn'nyo'njo somo Anɨtu kako oso a'amu homo somo wonɨmango ufisyɨmo'mo lonto a'amu yokumpohn'nyo aneso nje a'amu ne imo'nɨfitnne'ento hofɨkimo uhwosopo'mentisofoho. 28 A'amu hwahoponjoso hofɨko yo'mayo so'no ole lɨwo'nɨngkohofi, Wonyofoho. Nakwolaho. Oso hiso ne anefoho. Ose lɨwo'nɨngkohofofoho. Oso homo somne'no Anɨtu kako oloso ngko'nefoho. Woma'mo lɨmentisofoho. Anɨtu kako a'amu hwahoponjofe hunoso ne anefoho. Moi'wo umo'nono lɨmentisofoho. Oso'no yo'mayo so'ne hofɨkoe yofe ho'nomawo'nɨngkohofo somo Anɨtu kako wae yao'mentisofoho. 29 Anɨtu kako oso yo'mayo hiso imentiso so'no nakwo Anɨtuye tɨmopo nakwoe yofeso moho'nomo'nanehwono. 30 Anɨtu kako nakumo Jisas Kɨlaisɨ'njopo menehumajɨ'mentisofoho. Oso'no Anɨtu kako Kɨlaisɨye hungkunoso nakwoe hunomo moho'nonahumentiso so'no nakwo kakine'no huno nto'no syofɨsyalokuhwono. Kɨlais kako nakumo wopɨngo naloho'mentiso so'no Anɨtu kako nakumo wopɨngo kuyoho nelalofoho. Jisas kako honɨngkano wonyo somta'ni nakumo mpe enema'mentiso so'no kako nakumo Anɨtuye a'amu ne namokumentisofoho. 31 Oso'no a'amu Anɨtuye hungkuno mtɨ'mokumentohofo sohwa hofɨko ole mtɨ'mokumentohofi, Hwe fihwo kako kakoe yofeso woho'noma'nɨmo lososo kakoe yofe moho'noma'nonehoho. O'o, kako Kɨlais nakwoe Hwe Engo sohwoe yofe'nohini woho'nomano.